س محمد لمصلىالسبت 16 يوليوز 2022
يا خيي
يا صاحبي
يا رفيقي
يا صديقي
يا قريني
يا قريبي
و يا بويا
يا شهودي على الصادق لما هجر
خرج من الجماعة و عطى بالظهر
مشى ما ولى خلاني محتار
فغيابو ما بقات الدار دار
مشى الصدق
ما بقاو ناسو
قلال الصادق
شحت وصافو
مازال عشقو بالقلب عالق
و الصبر يتنفس بتنهادو
يا من كان فكل وقت صادق
بالصدق كان يتلاقى و يرافق
و كان يلا غاب الصدق يفارق
ثابت عل الخط فكل حالة
وقت تكون المنزلة ساهلة
و لبحر يوصفوه من عرفوه
صغير واخا ما نقص وسعو
و غرقو باقي مع الغدر فطبعو
عفيفنا ما يدير حساب
لعلو الجرف، زعيم
و زادها ما يدير حساب
لغلو الصرف، كريم
هو هو مع كل الناس صادق
حتى فوقت اللي المنزلة برد
و الدنيا بالأمطار بكاها الرعد
و سالت الدموع سخية
من نفس ماشية بالنية
وديان عظيمة قديمة
حاملة تكركر ديما
حارة تشق الهند
سيلها دايم عل الخد
حقاني كان،
من غير ما فصدرو من حق
ما يتكلم و لا بالشهادة ينطق
يضوي القعدة بنورو
و تسعد اللمة بحضورو
و تزيان الجماعة بهضورو
كيفما سمانا فليل شتاوي
حالك سميك غري عماوي
ضواها، لما ضرب، البرق
يا من صادقني و ما منو ريبة
فساعة الوصال
و إلى غبت يحضي الغيبة
يا من هو صريح فوجوه الناس
ما يلاغيهم بلسان الكاس
و لا يصرف الغوس اغواس
كيف بجموع عزاهم
كيف بطوابل الاعراس
لا بنيان يعمر
مع الشطارة في الساس
ما يسعد من راد
و الهم ساكن فالراس
ما تطرب الروح
بتقرقيب الأجراس
ما يكمل السعد
و الشك شاعل فالانفاس
ولا راحة للذات
و العشق فالقلب عساس
ما تدوم العشرة
بين الحكرة مع السماح و مكاين باس
ما يجواد شغل الليل
ما يتهدى مشموم من عرش البسباس
ما يزيان زرع البخيل
و لا بالملح تسقى الاغراس
الصواب عمرو كان
و لا عمرو زيان
بالكلام المعكوف
او لقوام المكلوف
النكافة ما تقدم العروسة
لابسة و السالف منتوف
واش من ليلو فالخلا بالعسة
يصبح كيف لي راح للمسقوف
ما يتلام لي مشى قاصد
مشجع او بالرهبة دمو جامد
فطريق بالخطر محفوف
واخا يكون وجهو من الخوف
وصل لونو شاحب مخطوف
يكفيه أنو تقدم الصفوف
و ياما حل من دفوف
الكريم لما ينفق المصروف
ما يتحجج بجبدة ما يجبد ظروف
ما يكون بعينيه و لا بالجوف
شك بأن كل ما نفق مخلوف
ما يمن ما يهمو يكون اسم معروف
و لا يتغير لو كان ذكرو محذوف
يا من بالحق فساعة القرح
يأثث كلامو كيف وقت الفرح
هو هو من غير الصفى ما ينضح
شحال من جواب بالقبح قاسح
يرجع بيه كل من فالري يصارح
كيف اليد تتحمل لقريص و الجرح
الغاية بالخير ترجع كلما زارت الجبح
تعالى قرب عندي تشوف
و كيفما النظرة بلمح العين شوف
البصر يكون اقوى برسم لحروف
الفحل ديما بقيمتو
و فراسو عنايتو
و لو كان خروف
تلقاه بلا تحقاق بلا تخياس
تعرفو بالعفة
و النخوة فالوقفة
و برفعة الراس
يزيان فيه و فقرونو الشوف
و كيفما لهاك زين الوردة على
ما فعودها من شوك عند القطفة
يلهيك هو على من معاه في الكلفة
و على ما حملت ظهورهم من صوف
و الحكمة مولاها معروف
بما نطق اللسان
من كلام بالميزان
و ما تصنع اليد من معروف
ماشي بما جمع من تراب و مال
العالم و الفايدة منو تكون محال
غير بالكتب مرصوصة عل الرفوف
و من حب يكون على بال
المعنى علاش معكوفة الدال
و جدر الحاء فعمق الجوف
يصلحو لولاد إلى صالح الخال
و السين تتميز من وراء الدفوف
العلم ماشي بسومة الكتوب
و لا يكون بنسخ المكتوب
أو تعمار الشوارج بالكذوب
أو بما على خشب المكتب مصروف
واحد لقليل زمان
سافر و قطع شلا بلدان
كان رجاه يلقى دوى للشنعة
يصفي و ينقي و يكبر السمعة
و بعدما طول فالغيبة و جال
و عاشر شلا من اقوام و رجال
رجع لقبيلتو و الرقبة قصيرة
و نفسو بحل اللغز عالمة خبيرة
صاح فالناس:
يا ناس، الفحل فحل
ماشي غير بالأصل
و ما يكفيه يكون ميصل
لكن بقلب واسع يحب الناس
و كبدة نحيفة صغيرة
أم الصلابة تحفي الفاس
ما تخرقها هندة
و لا تحركها هدة
و لا تفزع بوقوع الباس
الفحل بالشوفة معروف
و ما يفيد الناقص
لا طبيب و دواه
لا فقيه و ما قراه
لا سحار و ما عطاه
لا مساخن يماه لباه
لا عشوب عطار جداه
و لا يفيدو سف السفوف
و الى كان هذا حال لخروف
سارح فالخلا أولا معلوف
تعين على الكلفة فحل
بللي بان عليه من زعامة
و زينها زين الأصل
و بما فيه من نخوة و همة
ماشي على ما فسكيطو
من علو و دسم و شحمة
اللحم وحدو ما ليه قيمة
غير برجوعنا بيه من السوق مغلوف
و نهايتو على قضبان الشوى ملفوف
راه مول الشان يضيع شانو
قوى و لا خفاف ايمانو
إلى صبر و رجع لمن خانو
و ظن الهيبة يمكن تجي
من السماح للي هانو
و مول الأصل الزين المتين
بيه معروف
أصل كريم من جود الجدود
باش موصوف
أصلو يضيع كيف سقي الماء
بين الجروف
إلى هو عاش خايف مخبي
بين الصفوف
المصدر : https://www.safinow.com/?p=16355
عذراً التعليقات مغلقة